Петропавлдық NIS оқушысы Артур Штейнер өз жобасын Nazarbayev University Demo Day-де ұсынды

Петропавл қаласындағы Назарбаев Зияткерлік мектебінің оқушысы Артур Штейнер Астанадағы Назарбаев университетінде өткен Demo Day және Social Impact Award Kazakhstan 2026 халықаралық бағдарламасының марапаттау рәсіміне қатысты. Ол өзінің егде жастағы адамдарға арналған ақылды көмекші Help Mate жобасын ұсынды.
Биыл ұйымдастырушыларға 242 өтінім келіп, олардың ішінен 13 әлеуметтік маңызы бар жоба іріктелді. Бұл әзірлемелер білім беру, денсаулық сақтау, экология және инклюзия салаларындағы маңызды мәселелерді шешуге бағытталған. Бірнеше ай бойы финалистер тәжірибелі тәлімгерлермен бірге өз идеяларын жетілдірді. Байқаудың финалисті ретінде Артурға SAT және IELTS емтихандарына дайындық курстарына сертификаттар берілді. Tilu мектебінің негізін қалаушы, Nazarbayev University және Harvard University түлегі Әсел Амангелді мектеп оқушысы жобасының ерекше әлеуметтік пайдасын атап өтті.

Артур аталған іс-шараға қатысып, құнды тәжірибе алғанын атап өтті. Жобаға қатысу оған өз идеясын жария етуге, сарапшылардан пайдалы кеңес алуға және осы бағытта дамығысы келетін достар табуға септескен.