NIS Aktobe оқушысы экономикадан әлемдік олимпиададан қола медалін жеңіп алды

Ақтөбе қаласы жаратылыстану-математика бағытындағы NIS оқушысы Айым Жұбатқан Грекияда өткен халықаралық экономика олимпиадасының (Economics Olympiad International Final Round 2025) финалдық кезеңінде қола медальға ие болды.

Бұл беделді зияткерлік сайысқа әлемнің 28 елінен 130-дан астам оқушы қатысты. Олимпиада қатысушылардың аналитикалық және сыни ойлау қабілетін, экономикалық үдерістерді терең түсінуін және теориялық білімді практикалық тапсырмаларда қолдану дағдыларын дамытуға бағытталған.

Осылайша, финал ең мықтыларды жинады — әр елді ұлттық іріктеудің бес жеңімпазынан құралған команда таныстырды. Олимпиада бағдарламасы экономика мен қаржы бойынша теориялық және практикалық кезеңдерді қамтып, қатысушылардан терең білім мен оларды тәжірибеде қолдану қабілетін талап етті.

Қазақстандық команданы жеңісімен Қазақстан Республикасының Грек Республикасындағы Төтенше және Өкілетті Елшісі Тимур Сұлтанғожин жеке құттықтады. Ол оқушылардың жоғары деңгейдегі дайындығын атап өтіп, олардың жетістігі Қазақстанның халықаралық аренадағы беделін арттыруға ықпал ететінін ерекше атап өтті.

Жетістігіңмен мақтанамыз, Айым!