NIS Aktobe түлегі "Шапағат" медалінің иегері атанды

Ақтөбе қаласындағы Назарбаев Зияткерлік мектебінің түлегі Рустам Валеев «Шапағат» медалімен марапатталды.

Марапатты Алматы қаласының әкімі Дархан Сатыбалды Ұстаздар күніне орай Республика сарайында табыстады.

Рустам 2015–2021 жылдар аралығында Ақтөбе қаласындағы НЗМ-де білім алып, оқу кезеңінде беделді халықаралық олимпиадалардың жүлдегері атанды:
🥉 Халықаралық жер туралы ғылымдар олимпиадасы (IESO) – қола (2019);
🥈 Еуропалық география олимпиадасы (EGeO) – күміс (2019, 2020, 2021);
🥇 Халықаралық география олимпиадасы (IGeO) – алтын (2021).

Мектепті тәмамдағаннан кейін Рустам география пәні бойынша олимпиадалық дайындық бағытында еңбек етуді жалғастырды.

2021–2024 жылдары ол Ақтөбе қаласындағы НЗМ мен Павлодар қаласындағы НЗМ-де сыртқы жаттықтырушы ретінде қызмет атқарып, көптеген республикалық және халықаралық олимпиада жеңімпаздарын дайындады.

2022 жылдан бері Рустам — Қазақстан құрамасының география пәні бойынша жаттықтырушысы, сондай-ақ республикалық олимпиада тапсырмаларының құрастырушысы.

Оның жетекшілігімен ұлттық құрама 4 алтын, 3 күміс және 5 қола медаль иеленіп, IGeO 2025 халықаралық олимпиадасында жалпыкомандалық есепте 2-орынға ие болды — бұл Қазақстан тарихындағы ең жоғары нәтиже!

Қазіргі таңда Рустам Сатпаев атындағы ҚазҰТЗУ университетінің 3-курс студенті, мамандығы — «Қолданбалы геология».

Біз мектебіміздің түлегі Рустамның жетістіктерін, ел білім жүйесіне қосқан үлесін және жас буынға үлгі боларлық еңбегін мақтан тұтамыз!