Көкшетаудағы NIS оқушысы көркемсөз оқу байқауында жеңімпаз атанды

Көкшетаудағы NIS-тің 11-сынып оқушысы Оразханым Ғабдулла «Жыр алыптары: Жамбыл мен Мұқағали» мәнерлеп оқу байқауында бірінші орын иеленді. Байқау Қазақстан халқы тілдері күніне орай ұйымдастырылып, Жамбыл Жабаевтың 180 жылдығына және Мұқағали Мақатаевтың 95 жылдығына арналды.

Қатысушылар қазақтың қос көрнекті ақынының шығармаларын ұсынды. Байқауда өлеңді жатқа білу және мәнерлеп оқу ғана емес, шығарманың мазмұнын, көңіл күйін, ақынның сезімін тыңдарманға жеткізе білу де бағаланды.

Оразханым бірнеше жылдан бері көркемсөз оқуға қызығып, мәнерлеп оқумен айналысып келеді. Оның жетекшісі, қазақ тілі мен әдебиеті пәнінің мұғалімі Раушан Бейсенованың айтуынша, оқушы бала кезінен кітап оқуға қызығып, әрбір байқауға жауапкершілікпен қарайды.

«Оразханым бала кезінен алғыр, зерек оқушы. Оқуда озат, білім мен спортты қатар алып жүрген жан-жақты дарын иесі. Мәнерлеп оқу – оның тума таланты», – дейді Раушан Бейсенова.

Байқауда Оразханым Мұқағали Мақатаевтың «Бақыт деген не өзі?» өлеңін таңдаған. Оның айтуынша, шығармадағы сезім мен көңіл күй, өлеңнің сыршылдығы өзіне жақын болған.

«Мен Мұқағали Мақатаевтың “Бақыт деген не өзі?” өлеңін таңдадым. Бұл шығарма маған өте әсерлі, жүрекке жақын көрінді. Оны жай ғана оқып қоймай, өзім сезінген көңіл күй мен шығарманың ішкі сезімін тыңдарманға жеткізгім келді», – дейді Оразханым.

Өнер көрсету алдында оқушы шығармамен мұқият танысып, ақынның ойын, шығармадағы көңіл күй мен сезімді түсінуге тырысады. Педагогтің айтуынша, Оразханым үшін өзіне жақын туындыны таңдау маңызды. Бұл оған шығарманың мазмұнын тыңдарманға шынайы жеткізуге көмектеседі.

Оразханым байқаудың оңай болмағанын да айтады. Оның пікірінше, сайысқа қатысқан оқушылардың барлығы өз деңгейінде дайындалып келген.

«Сайыста қарсыластарым өте мықты болды. Сондықтан өз өнер көрсетуіме барынша көңіл бөліп, өлеңнің мағынасын толық жеткізуге тырыстым. Мен үшін автордың шығармаға салған сезімін тыңдарманға жеткізу маңызды болды», – дейді оқушы.

Оразханым 7-сыныптан бастап мектепішілік, желілік және республикалық көркемсөз оқу байқауларына тұрақты қатысып, жүлделі орындарға ие болып жүр.