Шымкент қаласы Абай ауданындағы жаратылыстану-математика бағытындағы Назарбаев Зияткерлік мектебінде дәстүрлі «Туған елге тағзым» өлкетанулық-зерттеу экспедициясы өтті. Бес күнге созылған тарихи-танымдық сапарға Астана, Алматы және Семей қалаларындағы Назарбаев Зияткерлік мектептерінен келген 70-тен астам оқушы қатысты.

Экспедицияның негізгі мақсаты – оқушылардың туған өлкенің тарихы мен мәдени мұрасын терең танып-білуіне, ұлттық құндылықтарды дәріптеуге, патриоттық сезімін нығайтуға және зерттеушілік дағдыларын дамытуға ықпал ету.

Бағдарлама аясында қатысушылар Түркістан өңірінің тарихи және мәдени маңызы зор нысандарын аралады. Оқушылар Ордабасы ауданындағы тарихи орындармен танысып, қазақтың тұңғыш кәсіпқой балуаны Қажымұқан Мұңайтпасұлының мұражайы мен кесенесіне барды.

Экспедиция барысында жас зерттеушілер Отырар мемлекеттік археологиялық қорық-музейінде болып, көне Отырар қалашығының тарихымен танысты. Сондай-ақ, Арыстан баб кесенесіне, Түркістан қаласындағы Қожа Ахмет Ясауи кесенесіне, Түлкібасы ауданындағы Түлкібасы әулие кесенесіне және өңірдің басқа да киелі орындарына саяхат жасады.

Қатысушылар ЮНЕСКО дүниежүзілік биосфералық резерваттар желісіне енген Ақсу-Жабағылы мемлекеттік табиғи қорығының мұражайында болып, еліміздің табиғи мұрасы мен биоалуантүрлілігі туралы мол мағлұмат алды.

Экспедиция барысында оқушылар өңірдің тарихи-мәдени ерекшеліктерін зерттеп қана қоймай, өзара тәжірибе алмасып, командалық жұмыстарға қатысып, шығармашылық және зерттеушілік қабілеттерін шыңдады.

«Туған елге тағзым» жобасы жас ұрпақтың туған жерге деген сүйіспеншілігін арттырып, ұлттық бірегейлікті нығайтуға бағытталған маңызды білім беру бастамаларының бірі болып табылады.

Экспедиция қорытындысы бойынша қатысушылар өздерінің зерттеу жұмыстары мен алған әсерлерін таныстырып, туған өлкенің тарихи-мәдени мұрасын сақтау мен насихаттаудың маңыздылығын атап өтті.