Зияткерлер неміс достарын құшақ жая қарсы алды

Зияткерлер неміс достарын құшақ жая қарсы алды

Алматы қаласындағы химия-биология бағытындағы NIS Германияның Баден Вюртенберг аймағы Оберкохен қаласында орналасқан Эрнст Аббе гимназиясымен алтыншы жыл “Оқушылар алмасу” жоба аясында серіктестік ынтымақтықты жалғастырып келеді. Өткен оқу жылының басында неміс тілін екінші шет тілі ретінде меңгеріп жүрген зияткерлер Германияға барып 2 апта бойы гимназияда сабақтарға қатысып, тілдерін жетілдіріп Гетеның отанымен жақын танысып қайтқан.

Серіктестік аясында “Германия мен Қазақстан адамдарының айналысатын жұмыс бағыттары” тақырыбында жобаны бастап, Германия еліндегі ірі кәсіпорындарында зерттеулерін жүргізіп келген болатын.

Енді зияткерлер неміс достарын Алматының төрінде құшақ жая қарсы алды.

Қонақтарға мектеп бойынша кампус-тур ұйымдастырылды, NIS директоры Маслихат Зәмірбекқызымен кездесті, мектептің тіршілігімен танысты, қазақтың ежелден келе жатқан қыш өнеріне арналған шеберлік сағатқа аса қызығушылық білдіріп, өздері айналдырған құмыраны қуана естелікке алды.

Белгілі ғалым, астроном, физик Эрнст Аббе атындағы гимназия оқушылары зияткерлердің көмегімен “Германия мен Қазақстан адамдарының айналысатын жұмыс бағыттары” жобаны оңтүстік астананың кәсіпорындарында жалғастырады.

Сонымен қатар Алматы өңіріндегі көрнекті жерлерге экскурсия, Зияткерлік мектепте сабақтарға қатысу жоспарлануда.