I INTERNATIONAL MUN CONFERENCE NIS CBD ALMATY делегаттары қазіргі заманның жаһандық сын-тегеуріндерін талқылады

Алматы қаласындағы химия-биология бағытындағы NIS-те Халықаралық MUN (Model United Nations) конференциясы өтті. Жүзден аса делегаттар жиналған форум алғаш рет республикадан тыс қатысушыларды да қамтып халықаралық дәрежеге ие болды.

Алматы қаласының  және облыс  мектептерінің оқушылары, SDU, Әл Фараби атындағы Қазақ Ұлттық университеті, Абылай хан атындағы Қазақ Мемлекеттік шет тілдер университеті студенттерімен қатар MUN алаңына Қырғызстанның беделді оқу орындарының студенттері мен оқушылары шақырылды. Бұл іс-шара жастарды дипломатия, халықаралық қатынастар және ғаламдық мәселелер саласында өз дағдыларын дамытуға бағытталған. Екі күн бойы БҰҰ-ның төрт комитетінде қатысушылар әлемдік мәселелерді, климаттың өзгеруі, адам құқықтары, халықаралық қауіпсіздік және экономикалық даму сынды тақырыптарды талқылады. Конференция барысында делегаттар түрлі елдердің атынан сөйлеп, талқыланған мәселелер бойынша олардың позицияларын талдап, әділ әрі тұрақты әлемді құру үшін өз шешімдерін ұсынды.

MUN қатысушыларға сыни ойлау, ағылшын тілінде пікір алмасып, келіссөздер жүргізу дағдыларын дамытуға үлкен мүмкіндік береді. Бұл болашақ дипломаттар мен саясаткерлер үшін өте маңызды.

Қонақтар MUN конференциясын Алматы қаласындағы химия-биология бағытындағы NIS халықаралық деңгейде болашақта да жалғастырып Орталық Азияның жастарын ғаламдық сын-тегеуріндерге жауап табуға ынталандыратынына сенім білдірді.