🌱КӘСІБИ МЕРЕКЕ “ҰСТАЗДАР КҮНІ” АТАП ӨТІЛДІ

Ұстаздар күні – бұл білімнің шамшырағы, жас ұрпақтың болашағын қалыптастыруға атсалысып жүрген ұстаздарға арналған ерекше мереке. Зияткерлік оқу ордасында ұстаздарды ұлықтауда мерекелік концерт ұйымдастырылды. Мәдени шарада әсем әндер шырқалып, зияткерлер мұғалімдерге ерекше көңіл күй сыйлады. Концерттік бағдарламада ұстаздардың ерен еңбегі бағаланды. Білім ордасының бірқатар ұстаздары мектеп директорының «Алғыс хатымен» марапатталып, олардың білім беру саласындағы ерен еңбектері атап өтілді. Сонымен қатар жақында өткен Wals халықаралық конференциясына қатысқан мектеп ұстаздары да алғыс хатпен марапатталды. Онымен қоса, ардагер ұстаздарымызға Назарбаев Зияткерлік мектептері ДББҰ басқарма төрағасы Әнуар Жанғозиннің «Құрмет грамотасы» табысталып, марапаттау рәсімінің соңғы нүктесі қойылды.

Мерекелік концерт ұстаздарға шат-шадыман көңіл күй сыйлап, олардың қажырлы еңбегі мен шәкірттерге деген махаббатына деген құрметтің белгісі болды. Көңілді кеш барысында мектеп ұстаздарына халықаралық жоба iEARN туралы тренинг өткізген халықаралық консультант, iEARN волонтері Павле Тваишвали де ұстаздарға өз құттықтауын жеткізіп, олардың еңбегін жоғары бағалады. Сөз соңында мектеп директоры да сөз сөйлеп, Зияткерлік оқу ордасында қызмет етіп келе жатқан барша ұстаздар қауымын кәсіби мерекемен құттықтады.

Ұстаз болу – тек мамандық емес, бұл жүректен шыққан үлкен жауапкершілік пен сүйіспеншілікке толы жол. Әр ұстаз болашаққа жол ашатын, адам өміріне маңызды әсер ететін тұлға. Осы мерекеде барша ұстаздарға алғыс айта отырып, шабыттарыңыз сарқылмасын, әрбір оқушыларыңыз биік белестерді бағындырсын дегіміз келеді.