🌱Мектебімізде Қаныш Сәтбаев атындағы геология кабинеті ашылды

Зияткерлік оқу ордамызда тарихи сәт! Ел іргетасын қалауда ғылымның дамуына үлкен үлес қосқан тарихи тұлға – Қаныш Сәтбаев атындағы кабинет ашылды. Бұл тек кабинет емес, болашақ геологтардың қадамдарын нығайтатын білім алаңына айналмақ.

Шара барысында мектебіміздің “Жас геолог” клубының мүшелері өз жетістіктерімен бөлісіп, айтулы күнде өз қуаныштарын білдірді. Себебі оқу ордамызда бұл кабинеттің ашылуы олардың ғылыми ізденіс жолында үлкен қолдау екенін атап өтті.

Ашылу салтанатында құттықтау сөз сөйлеген “ҚазақМыс Барлау” Бас директоры Ғалым Нұржанов пен “Назарбаев Зияткерлік мектептері” ДББҰ Басқарушы директоры және мектеп директоры Асель Бейсембинова тарихи сәтке ерекше мән беріп, болашақта геология саласындағы табыстарымыздың көбейетінін атап өтті.

Айта кетейік, кабинет “ҚазақМыс Барлау” қолдауымен толықтай жөндеуден өтіп, заманауи оқу жабдықтарымен, минералдар жинағымен жабдықталған. Бұл жер – жас геологтар үшін білім мен тәжірибені ұштастыратын ерекше мүмкіндік. Биыл алғаш рет мектебімізде геология саласына бағытталған оқу-жаттығу семинары өтті. Бұл дәстүр жыл сайын жалғасын тауып, жас зерттеушілерге жаңа белестерді бағындыруға жол ашпақ.

Қазір мектебіміздің 30 оқушысы “Жас геолог” клубының белсенді қатысушылары, олар еліміздің жетекші оқу орындарының гранттарына ие болып, халықаралық жарыстарда топ жарып келеді!

Сәтбаев ізімен – әлемдік жетістіктерге!