Мектебіміздің өнерлі зияткерлері желілік арт-фестивальде «Үздік сюжет» номинациясын жеңіп алды

Барлық NIS мектептері желісінде өткізілген «A Million Dreams» желілік арт-фестивалінде зияткерлеріміздің мюзикл бағыты бойынша көрсеткен өнерлері «Үздік сюжет» номинациясына лайық деп танылып, оқушыларымыз жеңімпаз атанды.

Өнерлі зияткерлер кіл мықтылар ішінен оза шауып, мюзикл бағытында үздік марапатқа ие болды. Араға 3 жыл салып өткізілген айтулы шара Шымкенттегі химия-биология бағытындағы NIS-те ауқымды деңгейде ұйымдастырылды. Зияткерлер асыға күткен желілік фестивальде оқушылар екі күн бойы өнердің әртүрлі жанрларында бақ сынасып, өз шеберліктерін шыңдады. Жас өнерпаздарға шығармашылық серпін берген бұл фестиваль жылдың ең айтулы шараларының бірі болып отыр.

Бес бағыт бойынша өткізілген фестивальде дарынды зияткерлеріміз Әлішер Орынбасар, Аружан Абдильданова, Рустам Мулюкбаев «Арт-фото» бағытында «Үздік орындау техникасы» номинациясын жеңіп алып, үздіктер қатарына қосылды.

Сондай-ақ, оқушыларды өнер фестиваліне дайындағаны үшін мектеп хореографы Жансұлу Болат пен қосымша білім беру педагогы, «Актерлік шеберлік» үйірмесінің жетекшісі Ибрай Искандар Назарбаев Зияткерлік мектептері басқарма төрағасы Әнуар Жанғозиннің алғыс хатымен марапатталды.