Ақтөбелік зияткер Айдархан Жұбатқан Халықаралық экономика олимпиадасында күміс медаль жеңіп алды.

Қазақстан құрамасы Халықаралық экономика олимпиадасында (IEO) үздік он мемлекеттің қатарына кірді. Отандық команданың бес қатысушысының үшеуі – Назарбаев Зияткерлік мектептерінің оқушылары.

Ақтөбе қаласындағы NIS оқушысы Айдархан Жұбатқан күміс медальға ие болса, Астана қаласындағы Зияткерлік мектеп оқушысы Томирис Ыдырысбаева мен Қарағандыдағы NIS оқушысы Батырхан Мұхтархан қола медальдарға қол жеткізді.

Айта кетейік, International Economics Olympiad биыл Гонконгте өтті. Білім бәйгесіне әлемнің 53 елінен 250-ден астам оқушы қатысты. 2023 жылы Қазақстан құрамасы жалпыкомандалық есепте 21-орын иеленіп, бизнес-кейс бойынша 22-орынға тұрақтаса, осы жылы оқушылар үздік ондыққа еніп, бизнес-кейс бойынша үздік жеті команданың қатарына кірді. Бұл табыс экономика бойынша олимпиадалық резерв арасында алғаш рет өткізілген іріктеу және оқу-жаттығу жиындарының нәтижесінде мүмкін болды.