Ақтөбелік оқушылар HackTheBookShelf хакатонында жүлде алып, кітапханаларды цифрландыруды қолға алмақ

«Террикон алқабы» IT-хабында Қарағандының Н.В. Гоголь атындағы облыстық әмбебап ғылыми кітапханасымен бірлесіп ұйымдастырылған HackTheBookShelf хакатоны аяқталды. Байқауға 65 команда қатысты, олар үш күн бойы өңірдің ең көне кітапханаларының бірін жаңғырту үшін цифрлық шешімдер әзірледі.

Жеңімпаздар екі номинация бойынша анықталды: онлайн платформа әзірлеу және мобильді қосымша жасау.

«Онлайн платформа әзірлеу» номинациясында екінші орынды Назарбаев Зияткерлік мектебінің 11-сынып оқушылары: Керей Бердішев, Абдуләзиз Ғабитов, Әлихан Бағланов, Максим Косов, Джафар Мәжитов және Даир Сырлыбаев жеңіп алды. Сайт жасағаны үшін команда хакатон ұйымдастырушыларынан 200 000 теңге көлемінде сыйақыға ие болды.

Команда өз әзірлемелерін Ақтөбе кітапханаларын цифрландыру үшін қолдануды жоспарлап отыр және жобаны коммерцияландыру мүмкіндігін қарастыруда.