Шымкенттегі ХББ NIS-те жаңа директор тағайындалды.

Шымкент қаласындағы химия-биология бағытындағы Назарбаев Зияткерлік мектебінің басшылығында өзгерістер орын алды. «Назарбаев Зияткерлік мектептері» ДББҰ Басқарма отырысының шешімімен директор қызметіне Лаура Серікболқызы Байтокаева тағайындалды. Жаңа басшыны мектеп ұжымына Басқарма Төрағасының орынбасары Сабыржан Садуақасов таныстырды.

Лаура Серікболқызы 2007 жылы Қорқыт ата атындағы Қызылорда университетінің «Шет тілі: екі шет тілі» мамандығын тәмамдаған. Сондай-ақ, 2019 жылы Назарбаев Университетінің «Управление образованием» мамандығы бойынша магистр деңгейін алды. Мұғалімнің педагогикалық шеберлігі сарапшы деңгейімен расталды.

Еңбек жолын 2007 жылы үш тілде оқытатын дарынды балаларға арналған «Мұрагер» мектебінде ағылшын тілі мұғалімі болып бастады. 2011 жылы оқу жұмысы жөніндегі директордың орынбасары, 2012 жылы уақытша ғылым жөніндегі орынбасар болып қызмет атқарды. Қызылордадағы NIS қабырғасын 2013-2016 жылдар аралығында ағылшын тілі пәнінің мұғалімі болып бастап, 2016-2020 жылдар аралығында Ақтау қаласындағы Назарбаев Зияткерлік мектебінде ағылшын тілі пәнінің мұғалімі, ағылшын тілі мұғалімдерінің әдістемелік бірлестігінің жетекшісі ретінде жұмыс жасады. 2020 жылы директордың ғылыми-әдістемелік жұмыс жөніндегі орынбасары болып тағайындалды. 2023 жылдан бастап Түркістадағы NIS-те директордың ғылыми-әдістемелік жұмыс жөніндегі орынбасары болып қызмет атқарған.