WRO–2024: «Жер-Ана қамқоршылары»

Бүгін Алматыда World Robot Olympiad халықаралық робототехника олимпиадасының республикалық кезеңі басталды.

Беделді байқау Алматыдағы физика-математика бағытындағы Назарбаев Зияткерлік мектебінің базасында өтеді. Екі күн бойы 272 (136 команда) оқушы RoboMission, Future Innovators, RoboSports және Future Engineers санаттарында бақ сынайды. Сондай-ақ биылғы жарысқа қатысушылардың жартысынан көбі жалпы білім беретін мектептерден келгенін, олардың ішінде 16 команда ауылдық оқушылардан құралғанын атап өткен жөн.

WRO байқауының биылғы тақырыбы – «Жер-Ана қамқоршылары». RoboMission және RoboSports санаттарында оқушылар арнайы аренада тапсырмаларды орындап, спорттық сайыстарға дербес түрде қатыса алатын роботтарды жинайды, ал Future Engineers санатында қатысушылар механика мен бағдарламалау бойынша терең білімді талап ететін инженерлік сынақтардан өтеді. Future Innovators санатындағы өнертапқыштар адамдардың табиғатпен үйлесімді өмір сүруіне көмектесетін, жойқын табиғи құбылыстардан қорғай алатын, климаты қатал жерлерде тұруға жағдай жасайтын робот модельдерін әзірлейді.

Олимпиаданың ашылу салтанатында «Назарбаев Зияткерлік мектептері» ДББҰ Басқарма төрағасы Әнуар Жанғозин жас робототехниктердің алдында ерекше миссия тұрғанын атап өтіп, оларға үлкен сенім артатынын білдірді:

– Осы жылғы тақырып – өте өзекті. Қоршаған ортаны қорғау, табиғатқа жанашырлық таныту – әрбіріміздің міндетіміз. Дегенмен экологиялық мәселелер жыл өткен сайын күрделеніп, оларды шешу үшін жаңа технологиялар мен инновациялық тәсілдер қажет болуда. Сондықтан биылғы жарыста ұсынылатын жобалар табиғат пен адамзаттың үйлесімді өмір сүруіне үлес қосады деп сенемін. Бұл міндеттерді шешу сіз сияқты жастардың қолында.

Айта кетсек, «Назарбаев Зияткерлік мектептері» ДББҰ – 2014 жылдан бері World Robot Olympiad халықаралық робототехника олимпиадасының Қазақстандағы Ұлттық ұйымдастырушысы. 10 жыл ішінде NIS еліміздегі робототехника саласының дамуына және отандық командалардың халықаралық деңгейдегі жетістіктеріне айтарлықтай үлес қосты.

Республикалық байқаудың нәтижелері 2024 жылғы 27 тамызда белгілі болады. Үздік шыққандар WRO олимпиадасының әлемдік кезеңіне жолдама алады. Әлемдік кезең 28-30 қараша аралығында Түркияның Измир қаласында өтеді деп жоспарланған.