"Жас ұстаз: табысқа апарар жол" атты облыстық жас педагогтар форумы

Петропавл қаласының Назарбаев Зияткерлік мектебінде "Жас ұстаз: табысқа апарар жол" атты облыстық жас педагогтар форумы өтті. Бұл маңызды іс-шараны Солтүстік Қазақстан облысының жас мұғалімдеріне арнап үшінші жыл қатарынан "Назарбаев Зияткерлік мектептері" ДББҰ педагогикалық шеберлік орталығы өткізуде.
Биыл форумға өңірдің әртүрлі аудандық және ауылдық мектептерінде еңбек ететін 100-ден астам жас мұғалім келді. Пленарлық бөлімде педагогтарды түрлі қызмет салаларының өкілдері ынталандырып, алға жетеледі. Олар қатысушыларды кәсіби жетістіктерге жетуге шабыттандырып қана қоймай, сонымен қатар кеңестерімен бөлісіп, практикалық жаттығулар ұйымдастырды.
Форум аясында алғаш рет "Сабақты қалай ерекше ету керек" атты шеберлік сабақтарын қатысушылардың өздері – жас педагогтар өткізді. Олар әріптестеріне өз тәжірибелері мен оқыту тәсілдерін ұсынды. Сондай-ақ форумда өзекті мәселелер: оқушыларды ынталандыру, білім беру процесіне жасанды интеллектті интеграциялау, функционалдық және эмоционалдық сауаттылықты дамыту, мектепте достық және қолдау атмосферасын құру, сондай-ақ оқытуды зерттеу қызметін енгізу сияқты мәселелерге назар аударылды. Петропавл қаласының Назарбаев Зияткерлік мектебінің педагогтары да жас мұғалімдерге тәжірибе алмасуға және кәсіби өсуге бағытталған шеберлік сыныптарын өткізді.
"Жас ұстаз" форумы білім беру саласында білім алмасу, шабыт пен даму алаңы ретінде өзінің маңыздылығын тағы да дәлелдеді.