Облыс ұстаздарының шеберлігі сынға түсті

NIS Семей базасында математика және информатика пәні мұғалімдеріне арналған облыстық олимпиада өтті.

Семей қаласының физика-математика бағытындағы Назарбаев Зияткерлік мектебі және Абай облысы білім басқармасы "Облыстық инновациялық-әдістемелік орталығы" ұстаздардың кәсіби құзыреттілігін дамыту, еңбек жолында жоғары нәтижелерге жетуге ынталандыру мақсатында дәстүрлі олимпиаданы жыл сайын ұйымдастырады.

Ашылу салтанатында мектебіміздің директоры Наркен Буркенов, Облыстық инновациялық-әдістемелік орталық директорының орынбасары Альфия Нигматуллина сөз алып, олимпиадалар мен байқаулар ұстаздардың тың жаңалықтарға ұмтылуға арқау болатынын атап өтіп, барша қатысушыларға сәттілік жолдады.

Математика пәні бойынша төртінші мәрте өткізіліп жатқан білім сайысының қатарына биыл алғаш рет информатика пәні де қосылды. Облыстық кезеңге аудан және қала мектептерінен 104 педагог іріктеліп алынған, олардың 54-і математика пәнінен, 50-і информатика пәнінен өз шеберліктерін көрсетуде.

Қазылар алқасының құрамы математика және информатика пәні оқытушылары, өткен жылғы олимпиада жеңімпаздары мен облыстық әдістемелік орталық өкілдерінен құралды.

Іс-шара соңында үздік көрсеткіш көрсеткен мұғалімдер арнайы сертификаттармен марапатталды.