Маңғыстаулық ұстаз «Үздік педагог» атанды

Республикалық «Үздік педагог» байқауында Ақтау қаласындағы Назарбаев Зияткерлік мектебінің қазақ тілі және әдебиет пәнінің мұғалімі Жаннұр Мауытова үздіктер қатарынан көрінді. Ағымдағы жылдың қыркүйек-қараша айында өткен байқау 3 кезеңнен тұрды. Осы үш кезеңнен сүрінбей өтіп «Үздік педагог» атағына ие болған Жаннұр Мауытованы бүгін ҚР Оқу-ағарту министрі Асхат Аймағамбетов марапаттады. Жаннұр Мауытова Зияткерлік мектептің білікті ұстазы, көптеген үздік ғылыми жобалардың жетекшісі. Ұстаздың бірнеше жобасы авторлық құқыққа ие болды. Республикалық конкурс комиссиясының құрамында қоғамдық бірлестіктердің, үкіметтік емес ұйымдардың, ата-аналар қауымының өкілдері, журналистер, белсенді педагогтер, білім және ғылым қызметкерлерінің қазақстандық салалық кәсіподақ ұйымының өкілдері болды. 2022 жылғы «Үздік педагог» байқауына 5000 мыңнан астам педагог іріктеліп, конкурс қорытындысы бойынша 64 жеңімпаз анықталып, марапатталды. «Үздік педагог» республикалық конкурсы 2012 жылдан бері өткізіліп келеді. Осы уақыт аралығында 600-ге жуық ұстаз үздік атанды.